Monday, 6 January 2014

வெகு நாட்களுக்குப் பின்
என்னோடு பேசத்துவங்கிய
நண்பன் 
சந்தேகம் கேட்டான்

கிழட்டு மாடுகளில்
பால்கறப்பது எப்படி..

அடப் பதறே..

அதைப் போன்ற சுலபம்
வேறேதும் இல்லையடா..

கிழட்டு மாடுகள்
அன்பின்பாற்பட்டவை
ஒரு புன்னகையில்
அல்லது 
ஒரு சோகப்பார்வையில்
அவற்றை வசப்படுத்த முடியும்..

ஒரு முறை 
உனக்கு அடிமையானதென்றால்
அதன்பின்னான
சொற்ப வாழ்நாளில்
உனக்கு அடிமையாகவே
தன்னை எழுதிக் கொள்ளும்
அவை..

முதல் புன்னகைக்குப் பின்
உனக்கு 
புன்னகைக்க வேண்டிய
அவசியம் கூட இல்லை..

பசிக்கிறது என்று சொன்னபின்
பால் வர
தாமதமானால்
நீ
சந்தோஷமாக கோபப்படலாம்..

மீயன்பினால்
உன்னிடம் பேச முற்பட்டாலும்
ஒரு பார்வையில்
அவற்றை
ஊமையாக்கிவிடலாம்..

அன்பைத் தந்தாலும்
எந்நாளும் அவை
அடிமை என்பதால்
குறைந்தபட்சஅன்பைக்கூட
திருப்பியளிக்க வேண்டிய
அவசியமில்லாதவை அவை..

முக்கியமாக
நீ அழைக்கும்போது
வரவில்லை எனில்
என்னவென்றாலும் பேசலாம்..

அவற்றை 
மாடினம்அல்ல 
என்று கூட
கவிதை எழுதலாம்..

மொத்தத்தில்
அந்திம காலத்து மாடுகளை
பயன்படுத்துவதும்
தூற்றுவதும்
அவ்வளவு எளிது..

அறிந்தாலும் சகித்துக் கொள்ளும்
கிழட்டு மாடுகள்..

Saturday, 4 January 2014

என்ன சொன்னாய்..?

கீச்சாங்குருவிகள்
சற்று 
தாமதமாகதான் வாய்மூடின..

மலையருவியைப் பற்றி
சொல்லவே வேண்டாம்..

ஙொய்யெனும் தேனீக்களுக்கோ
உனது
வார்த்தைகளைப் பற்றிய
கவலை இல்லை..

சுவர்க் கோழிகள்
என்றைக்கு வாய் மூடின..

வேறொன்றுமில்லை..

அதிர்ந்ததிர்ந்து
அடங்கும் என்
மனதுக்காகக் கேட்கிறேன்..

பொய்யில்லாமல் சொல்..

அப்போது நீ
என்ன சொன்னாய்..?
பசியாறியவனின்
தூக்கத்துக்காகவும்
நோய் நீங்கியவனின்
பெருமூச்சுக்காகவும்
ஏங்கிய ஒருத்தி காத்திருக்கிறாள்..

ங்ஙா என்ற
ஒற்றைச் சொல்லில்
சாபல்யம் அடைந்தவள்..
எச்சில் வடியும்
ஒற்றை முத்தத்தில்
பிறவிகள் கடந்தவள்..

முதுமையின் நிசப்த வனத்தில்
வார்த்தைகளைப்
பிச்சையெடுத்து
காத்திருக்கிறாள்..
எளிய மனிதர்களின்
கண்ணீர்
அவர்கள் சிறுவர்களாக இருக்கும்போதே
அறுவடைக்கு
தயார் செய்யப்பட்டு விடுகிறது..

துக்கங்கள் தினந்தோறும்
பல்வேறு வடிவங்களில்
அவர்களுக்கு வழங்கப் படுகின்றன -
மாத்திரை வடிவிலோ
டானிக் வடிவிலோ
அல்லது
ஒரு பிரம்பின் வடிவிலோ..

சில நேரம்
அதிக கண்ணீர்
தேவைப்படும்போது
எளியவர்களின் 
சொந்தங்கள் கொல்லப்பட்டு
அறுவடை முடிக்கப்படுகிறது..

எந்நேரமும் 
பசித்திருக்க வைக்கப்பட்டு
அவர்கள் 
கண்ணீருக்காக 
தயார் செய்யப் படுகிறார்கள்..

கண்ணீர் தடைப்படக் கூடாது
என்பதற்காக
தடையின்றி
தண்ணீர் மட்டும் வழங்கப்படும்..

எந்நாளும்
எளியவர்கள் நம்புவதற்காக
எளியவர்களின் சிநேகிதனாகவே
அறுவடையாளர்கள்
சித்தரிக்கப்படுகிறார்கள்..

உண்மையில் சொல்லப் போனால்
எளியவர்களின்
நம்பிக்கையைப் பெறுவதற்காகவே
அந்த
கண்ணீர் பயன்படுத்தப்படுகிறது..

கசிந்துருகிக் காணப்படும்
கண்ணீர்த்துளி எல்லாம்
தன்னிடம் இருந்தே வந்தது
என்பதை அறியாமல்
தன் முன் தோற்றப்படும்
ஒவ்வொரு கண்ணீர்த்துளிக்கும்
தன் 
துயரத்தை எல்லாம் 
முத்தமாக இட்டு அனுப்புகிறான்
எளியவன்..

எளியவனின் கண்ணீர்த்துளிக்கு
விமோசனமே இல்லை சாமிகளா..

Wednesday, 1 January 2014

உதிரும் இலைகளை 
ஒவ்வொன்றாக எடுத்து
கோர்த்துக் கொண்டிருந்தான்
அவன்..

எல்லா 
வனத்தீயிலும்
அவனது மாலையில் இருந்த
இலைகள் மட்டுமே
தப்பிப் பிழைத்திருந்தன..

ஆயிரமாயிரம் கோடி கோடிக்கு மேல்
எண்ண மறந்திருந்தாலும்
அவனது மாலை
ஒரு
புன்னகையின் நீளமே இருந்தது..

மழையை
வனத்தை
பள்ளத்தாக்கை
நதியை
செடியை
அருவியை
கடலை
செத்த மானின் நிறத்தை
புலியின் பசியை
தளர்ந்த மரத்தின்
முத்தத்தை
அவன் இலைகளாகக் கோர்த்திருந்தான்..

எல்லாரும் சொன்னார்கள்
அவன்
நிலத்துக்குள் 
புகுந்துவிட்டானென்று..

எல்லாருக்கும் தெரியும்
அவன் நிலமாகவே
வாழ்கிறானென்று..

யாருக்காவது தெரியுமா..

ஒரு நாள் அவன்
அண்டா கா கசம்
அபு கா ஹுக்கும்
திறந்திடு சீசேம்
என்றபோது
ஒரு புதையல் பேழை
திறப்பது போல
பூமி திறந்ததை..?

Saturday, 28 December 2013

மன்னிப்பு என்பது
ஒரு பக்கம்
ஒற்றை இறகின்
எடையாயிருக்கலாம்
மறுபக்கம்
பருத்த இரும்பின்
எடையாயிருக்கலாம்..

அதே போலதான் கண்ணீரும்..

சொற்கள் எடையற்றவை
ஆயினும்
சாபங்கள்
பெரும் நிறையுடையவையாகும்..

ஆயிரம் வார்த்தைகளில்
முயன்றாலும்
முத்தங்களின் வெதுப்பை
புலப்படுத்த முடியுமா என்ன..?

மன்னிக்கவும் 
ஐயா..
இந்த மொழியை
நீங்களே வைத்துக் கொள்ளுங்கள்..
எனக்கு
மௌனமே போதுமானது..

Thursday, 26 December 2013

அன்றைய வசூல்
ஐம்பது ரூபாய்
கொடுக்காததற்காக
அந்த
பூக்காரப் பெண்மணியின்
கற்பு பற்றிய சந்தேகங்களை
பட்டியலிட்டுக் கொண்டிருந்தார்
அந்த
கந்து வட்டிக்காரர்..

அண்ணே..
கொஞ்சம் பக்கத்துல 
வாங்கண்ணே
என்றழைத்து
அந்த தட்டை
துழாவி கண்டடைந்து
சத்தமெழுப்பாமல்
ஐந்து ரூபாய்
பிச்சை போட்டு விட்டுப்
போகிறார்
கண் தெரியாத பேனா விற்பவர்..

இரவு நேர
உணவுக்கடையின்
கழிவுகளை அப்புறப்படுத்தும சிறுவன்
கடைதாண்டி
மட்டையாகிக் கிடக்கும்
அவனது அப்பா போன்ற ஒருவனின்
வேட்டியை 
சரி செய்துவிட்டுப் போகிறான்..

தங்கியிருக்கும்
விடுதியின் கைப்பிடிச்
சுவர் தாண்டி
வேடிக்கை பார்க்கிறேன்..

உடல் சுருண்டு
குளிரை
வரவேற்பதாகவோ வெறுப்பதாகவோ
படுத்துக் கொண்டிருக்கிறது செவலை நாய்..

பிடித்தவன் என்றால்
வாலை ஆட்டும்..
பிடிக்காதவன் என்றால்
குலைக்கும் அல்லது கடிக்கும்..
இந்த எளிய நாயின்
நீதிகள் கூட இல்லாத நான்

.....
.....
.....

நாயாகவேனும் பிறந்திருக்கலாமோ..