பெயர்ச் சொல், வினைச் சொல்

வலியைப் பற்றிய

ஒரு சிறுவனின் பாடலில் 

இருந்தது

ஒரு நல்ல

அப்பாவைப் பற்றிய கனவு.

வலியைப் பற்றிய 

அம்மாவின் பாடலில் 

இருந்தது

முழுக்க முழுக்க 

அப்பாவின் வசைச் சொற்கள்.

வலியைப் பற்றிய 

ஓர் உதவி இயக்குனனின்

பாடலில் இருந்தது

ஓர் அப்பாவைப் பற்றிய கதை.

தயவு செய்து சொல்லுங்கள்..

வலி 

மற்றும் 

அப்பா

இரண்டும் 

வேறு வேறு சொற்கள்தானே?

மழை

மழைத் துளிகள் விடாமல்

நிலத்தோடு பேசுகின்றன 

மழைப் பேச்சு.

நாம் சந்தித்தபோது 

பெய்த மழை 

அல்ல இது.

நாம் பிரிந்தபோது

பெய்த மழையும் அல்ல.

ஒரு வேளை 

யாரோ இன்று 

சந்திக்கிறார்கள் போலும்.

அல்லது 

பிரியவும் கூடும்.

பிரிவெனில் ஒரு வசதி

மழையில் அழுதால் 

தெரியாது.