பெருஞ்சுமையுடையோன் போல
தள்ளாடி வருபவன்
சுமந்து வருவது
ஒரேயொரு ஈர எச்சில் முத்தம்..

இருக்கிற வேலையை எல்லாம்
எறிந்துவிட்டு
அவனிடம் கிழவி பெறுவதென்னமோ
ஒரேயொரு ஈர முத்தம்

நீ யாரை முத்தமிட்டாயென
அவனிடம் கேட்டால்
அப்பத்தா என்றே
தெளிவாய் சொல்லுவான்

ஒரேயொரு முத்தத்துக்காக
அவமானங்களைப்
புறந்தள்ளிய கிழவியிடம்
கேட்டால்
அவனுக்கு
அவங்க தாத்தா பேரு
என்றே சொல்வாள்..

முத்தங்கள் தின்று வாழ்பவள்

எறியப்பட்ட கத்தியை
தயவு செய்து எடுத்துப் போ..

உன் தாகம் தணியுமளவுக்கு
அது
ரத்தம் கொண்டு வராது.

அந்த
அநாதை தெருப்பாடகனிடமிருந்து
தந்திரமாக ஒருபாடலை
திருடிவிட்டான் அவன்.

ஆசுவாசத் தனிமையில்
அப்பாடலின் வாலில்
நூலினைக்கட்டி
பறக்கவிட்டுப் பார்க்கிறான்.

அது சோர்வுற்று தரையமரும்போது
நிதானமாக
முதலில் கால்கள்
பின்னர் இறகுகள் என்று
ஒவ்வொன்றாக
ரசனையுடன் பிய்த்தெடுக்கிறான்
அவன்.

ஏனென்ற கேள்வியுடன்
பெரியகண்கள் கலங்கியிருக்க
அவனையே பார்த்தபடி இருக்கும்
பாடலின் இதயத்தில்
கடைசி குண்டூசியையும்
புன்னகையுடன் செலுத்துகிறான்.

வெடித்த இதயத்தினின்று
தூவிகளைப் போல
காற்றெங்கும் பரவி
விரைந்து விலகிச் செல்கின்றன
சின்னஞ்சிறு ஸ்வரங்கள்.

திகைத்து செயலற்று
பறந்து போகும் அவற்றைப்
பார்த்தபடி இருக்கும்
அவனுக்குத் தெரிந்துவிட்டது
இன்றிரவும் ஒருபாடல்
கங்கினைப் போல் அவனைப் பொசுக்க
நனைந்தே கருகப்போகிறது
ஒரு தலையணை..

அற்புதம் செய்பவர்களிடம்
எனக்கு
இரண்டேயிரண்டு
கேள்விகள்தாம் உள்ளன

(1)
நீங்கள் வலக்கை உயர்த்தி
அற்புதங்கள் செய்தபோது
உங்கள்
இடக்கைகள்
என்ன செய்து கொண்டிருந்தன?

(2)
ஒரு கை இல்லாதவர்களோ
இருகையும் இல்லாதவர்களோ
அற்புதங்கள் செய்ய
ஆசீர்வதிக்கப்பட மாட்டார்களா?

தேர்ந்த
கனவுக்குயவனின்
அறையிலிருந்து திருடிய
மண்
உயிரற்றே கிடந்தது..

ஒரு வேளை
அவனது
கைகளைத் திருடியிருக்க வேண்டுமோ..

இரு சக்கர வாகனத்தின்
பொருள் வைப்பிடத்தில்
எப்போதும் இருக்கும்
பிஸ்கெட்டுகள் காணாது போய்விட்டன..

பிரியமுடன் அழைப்புமணியடிக்கும்
அலைபேசியை
யோசித்தே எடுக்கிறான் அவன்..

வேப்பமரத்தடியில்
நாற்றம் மறந்து
உரையாடிய உரையாடல்கள்
கனவுகளுக்குள்
சென்று பதுங்கிக் கொண்டன..

அட ஆமாம்..
மறுபடியும்
கோடைக்காலம் வந்துவிட்டது..

சிறு வயதில்
பொம்மைகளை அள்ளி வந்தது போலவே
அள்ளி வருகிறாள் பிரச்சினைகளை
மகள்.

நெருங்குமுன் அப்பனின்
வாடல் முகம்
ஏதோ உணர்த்த

பொம்மைகளை எறிவது போலவே
பிரச்சினைகளை எறிந்துவிட்டு
ஓடி வந்து
தலைவருடுகிறாள்..

என்ன இருந்தாலும்
அவள் செல்லமகள்..
என்ன இருந்தாலும்
அவன்
செல்ல அப்பன்..